繼續同史友們探究一啲有趣嘅歷史謎題，由於古代厚葬之風嘅興起，歷朝歷代嘅帝皇都會喺死後得到厚葬，因為佢哋深信死後係存在另一個世界。而亦都因為呢種觀念，令到貴族、皇室嘅墓穴成為唔少盜墓賊嘅目標，所以古代工匠都想方設法去防止有人盜墓。
除咗隱藏陵墓嘅位置、派遣軍隊守陵之外，最直接嘅一個方法就係喺建陵之時設置機關。咁有咩機關係最有效可以防止盜墓賊呢？阿史今次就同大家介紹一下明朝定陵一道幾多人都推唔開嘅門啦！喺1956年以郭沫若、沈雁冰、吳晗、鄧拓、范文瀾等人為首嘅考古團隊就對明朝定陵展開發掘工作，當時喺發掘萬曆皇帝朱翊鈞、孝端、孝靖兩皇后嘅墓穴之時，其實喺地宮位置就遇到一個難題。
喺地宮外就有一道大石門，無論考古團隊出動幾多人、用幾大力都好，呢道門就係點都推唔開。而經過進一步研究就發現，呢道石門並唔係完全閉合，反而中間仲留有3公分縫隙，而且仲有一塊石柱頂住大門。呢塊石嘅原理就相當於現代門鎖，當石門關閉之後，石柱上端就會與地面凹槽形成斜向頂實石門，就算外面點用力都好，都唔能夠推開石門。得知呢個原理後，考古團隊就以粗鐵線與木棍作為工具，慢慢將石柱拉直，先至可以順利打開石門，呢種古代防盜方法真係充滿智慧。
原圖嚟自網絡